Qurban bayramı ilə əlaqədar vətəndaşlar rayonlara üz tutur. Bu, qiymətlərə də təsir edir.
Açıqlama verən turizm üzrə ekspert Ceyhun Aşurovun sözlərinə görə, bayram günləri ilə əlaqədar olaraq ölkədə səyahət edənlərin, daxili turistlərin sayı artıb:
“Bu, regionlara gedənlərin sayına da müsbət təsir göstər. Əvvəlki illərdə müşahidə etmişik ki, qiymətlər həmin dövrlərdə kəskin artır. Pandemiya dövründə də biz daxili tələbatın ciddi şəkildə artdığını müşahidə etdik. 2019-cu ildə ölkə xaricinə 5 milyondan çox Azərbaycan vətəndaşı səyahət edirdi. Lakin indiki halda xarici səfərlər öz sayını bərpa etməyib. Səfərlərin sayı hələlik yarıya qədər bərpa olunub. Bu, o deməkdir ki, daxili tələb hələ də yüksəkdir”.
Ekspert bildirib ki, tələbin yüksək olduğu dövrdə bazara yeni hotellər, kənd evləri, villalar, müxtəlif apartmanlar daxil oldu:
“Bu da istehlakçıların xeyrinə alternativ qalma yerləri kimi təklif edildi. Bunlar qiymətlərin kəskin bahalaşmasının qarşısını alır. Əvvəlki illərlə müqayisədə, kəskin bahalaşma və yer çatışmazlığı müşahidə olunmur. Hətta keçən ilə nisbətən qiymətlər daha uyğundur”.
C.Aşurov qeyd edib ki, bu dövrdə bölgələrə də səfərlər artır:
“Ənənəvi olaraq Qəbələ, Şamaxı, Quba, Qusar, Şəki istiqamətlərində qiymətlər daha yüksəkdir. Çünki bu bölgələr həm də xarici turistlərin səfər etdiyi bölgələrdir. Amma yollar düzəldikdən sonra cənub bölgəsi, sürət qatarı açıldıqdan sonra Gəncə regionu turistlər üçün marağa səbəb olur. Çünki bu istiqamətlərdə qiymətlər hazırda daha əlverişlidir”.
Əmlak məsələləri üzrə ekspert Ramil Osmanlı Trend-ə bildirib ki, rayonlarda kirayə qiymətləri turist axını ilə əlaqədar artıb:
“Ümumiyyətlə, mövsümlə əlaqədar olaraq rayonlara üz tutanların sayı artıb. Qiymətlərdə də müəyyən artımlar müşahidə olunur. Məsələn, gündəlik 50 manat qiymətə kirayə verilən evlər hazırda 70-80 manata təklif olunur. Gündəlik 100 manata təklif olunan mənzillərin qiymətləri isə 130-150 manat aralığında dəyişir. Bu da regiona turist axınından asılıdır”.
Ekspert qeyd edib ki, artımlar Bakıya yaxınlıq dərəcəsinə, infrastrukturuna görə dəyişir:
“Müşahidələr göstərir ki, ən yüksək qiymətlər Quba-Xaçmaz iqtisadi rayonu üzrə qeydə alınır. Xüsusilə Quba daha sonra isə Qusar rayonu burada ilk yerlərdə qərarlaşır. Daha sonra isə Şamaxı-İsmayıllı iqtisadi rayonu gəlir. Əvvəllər bu iqtisadi rayonda infrastruktur problemləri olsa da, Prezident İlham Əliyevin səfərindən sonra bu problemlər aradan qaldırıldı. Artıq yolun Şamaxıdan İsmayıllıya qədər olan hissəsi istifadəyə verilib. Qəbələ istiqamətində müəyyən çətinliklər var.
Cənub zonasında da müəyyən qiymət artımları müşahidə olunur. Bütövlükdə isə artımlar sadaladığım 3 bölgənin xeyrinə dəyişir”.
